തുടക്കം മുതൽ ആക്രമിച്ച് കളിച്ച് പഞ്ചാബ് കിങ്സിനെ 6 വിക്കറ്റിന് തകർത്ത് ഡൽഹി കാപ്പിറ്റൽസ്. സെഞ്ച്വറി നഷ്ടമായെങ്കിലും 49 പന്തിൽ നിന്ന് 92 റൺസ് നേടിയ ശിഖർ ധവാൻ ഗംഭീര ബാറ്റിങ് പ്രകടനമാണ് നടത്തിയത്. 13 ഫോറുകളും രണ്ട് സിക്സറും പറത്തിയ ധവാൻ ഡൽഹി വിജയം ഉറപ്പിച്ച ശേഷമാണ് പുറത്തായത്. യുവതാരം പൃഥ്വി ഷാ തകർപ്പൻ തുടക്കം ടീമിന് സമ്മാനിച്ചു. വെറും 17 പന്തിൽ നിന്നാണ് അദ്ദേഹം 32 റൺസ് നേടിയത്.
ഡെത്ത് ഓവറുകളിലും പഞ്ചാബിന് മത്സരത്തിലേക്ക് തിരിച്ച് വരാനായില്ല. 13 പന്തിൽ നിന്ന് 27 റൺസുമായി പുറത്താവാതെ നിന്ന മാർകസ് സ്റ്റോയ്നിസ് ടീമിനെ അനായാസം വിജയത്തിലേക്ക് നയിച്ചു.
