നടരാജനെ എന്തിന് പുറത്താക്കിയെന്നത് വിശദീകരിച്ച് ലക്ഷ്മണ്‍!

0
54

മുംബൈ ഇന്ത്യന്‍സിനെതിരായ നിര്‍ണായക മത്സരത്തില്‍ ക്രിക്കറ്റ് ആരാധകരെ അമ്പരിപ്പിച്ച കാര്യമാണ് ടി നടരാജനെ സണ്‍റൈസേഴ്‌സ് ഹൈദരാബാദ് ഒഴിവാക്കിയെന്നത്. മുന്‍ മത്സരങ്ങളില്‍ ഭേദപ്പെട്ട പ്രകടനം നടത്തിയിട്ടും മുംബൈ പോലുള്ള ഒരു ടീമിനെതിരെ നടരാജനെ എന്തുകൊണ്ട് പുറത്തിരുത്തിയെന്ന് വിശദീകരിക്കുകയാണ് ഹൈദരാബാദിന്റെ ഉപദേശകന്‍ വിവിഎസ് ലക്ഷ്മണ്‍.

ഇടതുകാല്‍മുട്ടിലെ വേദനയെ തുടര്‍ന്നാണ് നടരാജന്‍ കളിക്കാതിരുന്നതെന്ന് ലക്ഷ്മണ്‍ വ്യക്തമാക്കി. നടരാജന് പകരം മറ്റൊരു ഇടംകൈയ്യനായ ഖലീല്‍ അഹമ്മദിനെ ഉള്‍പ്പെടുത്തുകയും ചെയ്തു. നടരാജന്റെ പരിക്ക് നിരീക്ഷിച്ചുവരികയാണെന്നും മുന്‍ ഇന്ത്യന്‍ താരം അറിയിച്ചു. പകരക്കാരനായെത്തിയ ഖലീലിന്റെ പന്തേറില്‍ ലക്ഷ്മണ്‍ സംതൃപ്തനാണ്. സീസണിലെ ആദ്യ മത്സരമായിട്ടുകൂടി താരം സാഹചര്യത്തിനനുസരിച്ച് പന്തെറിഞ്ഞെന്നും ഖലീലിനെ ഉള്‍പ്പെടുത്തിയതില്‍ തെറ്റു പറ്റിയില്ലെന്നും ലക്ഷ്മണ്‍ വിശദീകരിച്ചു.

പ്രധാനമായും മൂന്നു പിഴവുകളാണ് ഹൈദരാബാദിന്റെ തോല്‍വി ഉറപ്പിച്ചത്. ഫോമിലല്ലാത്ത പൊള്ളാര്‍ഡിന്റെ അനായാസമായ ക്യാച്ച് വിജയ് ശങ്കര്‍ നിലത്തിട്ടതാണ് പ്രധാന കാരണങ്ങളിലൊന്ന്. അവസരം മുതലെടുത്ത പൊള്ളാര്‍ഡ് അവസാന ഓവറില്‍ രണ്ടു സിക്‌സറുകള്‍ ഉള്‍പ്പെടെ നേടിയ 16 റണ്‍സ് കളിയുടെ ഗതിതന്നെ മാറ്റിമറിച്ചു. 140നുള്ളില്‍ ഒതുങ്ങുമായിരുന്ന മുംബൈയുടെ സ്‌കോര്‍ 150ല്‍ എത്തിച്ചത് 22 പന്തില്‍ 35 റണ്‍സെടുത്ത പൊള്ളാര്‍ഡാണ്.

നന്നായി ബാറ്റ് ചെയ്യുകയായിരുന്നു ഹൈദരാബാദ് ഓപ്പണര്‍മാര്‍ തീര്‍ത്തും നിര്‍ഭാഗ്യകരമായ രീതിയില്‍ പുറത്തായതാണ് തോല്‍വിയുടെ മറ്റൊരു കാരണം. 67 റണ്‍സിന്റെ കൂട്ടുകെട്ടുണ്ടാക്കിയ ജോണി ബെയര്‍സ്‌റ്റോ ഡേവിഡ് വാര്‍ണര്‍ കൂട്ടുകെട്ട് പൊളിഞ്ഞതോടെ ഹൈദരാബാദ് തകര്‍ന്നു. ക്രുനാല്‍ പാണ്ഡ്യയുടെ പന്തില്‍ ഹിറ്റ് വിക്കറ്റ് ആയാണ് ബെയര്‍‌സ്റ്റോ പുറത്താകുന്നത്.

മധ്യനിരയുടെ ബാറ്റിങ് തകര്‍ച്ചയും ഹൈദരാബാദിന്റെ തോല്‍വി ഉറപ്പിച്ചു. രണ്ടുമുതല്‍ ഏഴുവരെയുള്ള വിക്കറ്റുകള്‍ വീണപ്പോള്‍ 56 പന്തില്‍ 50 റണ്‍സാണെടുത്തത്. സീസണില്‍ ഏറ്റവും കരുത്തുകുറഞ്ഞ മധ്യനിര ഹൈദരാബാദിന്റേതാണ്. ശരാശരിയിലും താഴെയുള്ള ഇന്ത്യന്‍ കളിക്കാരെ കൂടുതല്‍ ഉള്‍ക്കൊള്ളിച്ചുകൊണ്ടുള്ള പരീക്ഷണം പാളി. കെയ്ന്‍ വില്യംസണ്‍ തിരിച്ചെത്തുന്നതോടെ ഇതിന് പരിഹാരമാകുമെന്നാണ് ടീമിന്റെ പ്രതീക്ഷ.

LEAVE A REPLY

Please enter your comment!
Please enter your name here